என்ன எழுதுவது??

கடந்த சில நாட்களாவே ஒரு விதமானப் பதற்றம், ஏதோ ஒரு அசம்பாவிதம் நடக்கப் போகுதுன்னு உள் மனசு சொல்லிட்டே இருந்துச்சு, அது இன்னைக்கு நடந்துடுச்சு. நானும் ஒன் ஃபைன் நைட்டு ரூம்ல லைட்டு போட்டு யோசிச்சேங்க, 10 மணியிலேர்ந்து 12 மணி வரைக்கும் எதுக்கு எழுதனும்னு யோசிச்சேன், 12 மணியிலேர்ந்து 2 மணி வரைக்கும் எழுதுனா என்ன தப்புன்னு யோசிச்சேன், 2 மணிக்கு அப்புறம் எழுதுறதுன்னு முடிவு பண்ணிட்டேன். ஆனா என்ன எழுதறதுன்னுதான் முடிவு பண்ணல அல்லது பண்ண தெரியல. அதனால்தான் ப்ளாகோட பேரு "என்ன எழுதுவது" னு வச்சுட்டேன் (அப்பாடி ப்ளாகோட பெயர்க்காரணத்தை சொல்லியாச்சு!). அப்புறம் இந்த ஞானம், நமக்கு அது பேருல மட்டும்தாங்க இருக்கு. எனக்கு இந்த நாமத்தை சூட்டிய என்னோட அத்தைக்கிட்ட பெயர்க்காரணத்தைக் கேட்டேன், இந்த குழந்தை எதிர்காலத்தில் ஒரு பூட்ட கேசாகத்தான் (உபயம்: வசூல்ராஜா) வரும் என்று தெள்ளத் தெளிவாகத் தெரிவதால் (என்ன ஒரு கணிப்பு பாருங்க? நம்ம முக ராசி அப்படி!) பெயரில் மட்டுமாவது ஞானம் இருக்கட்டும்னு வச்சாங்களாம்.

ஆனா அத எங்க தாத்தா சொர்கத்துல இருந்து பார்த்துட்டு ரொம்ப ஃபீல் பண்ணி பாட்டியோட கனவுல வந்து ஒரே அழுகாட்சியாம். பேரன இப்படி எல்லாரும் அவமானப் படுத்திட்டாங்களேன்னு ஃபீலிங்க்ஸ் ஆயிருப்பாங்கன்னு அவசரப்பட்டு நீங்க தப்பா நினைச்சுடாதீங்க. ஏன்னா அவங்க ஃ பீல் பண்ணது இப்படி ஒரு புள்ளைக்கு நம்ம பேரு வர மாதிரி வைச்சுப்புட்டாங்களே அப்படின்னு. அதனால எங்க பாட்டி உடனே புள்ள புரட்சிக்கலைஞர் கலர்ல செக்கச்செவேல்னு இருந்ததால இன்று முதல் அனைவராலும் விஜய் என்று (ம்) அன்போடு அழைக்கப்படுவார்னு அறிவிச்சு தாத்தாவோட ஆன்மாவ சொர்க்கம் வரைக்கும் சாந்திப் படுத்தினாங்க. ஆனா நான்தான் கடந்த இரண்டு ஆண்டுகளா இந்த பெயரைச் சுமக்க சிரமப்படுகிறேன் (சமீபத்திய காரணம் சுறா- தி லீடர்). சரி விடுங்க என்னோட சோகம் என்னோட போகட்டும்.

எங்க ஆரம்பிச்சேன்? ஆங் ஞாபகம் வந்துடுச்சு, ஞானத்துல ஆரம்பிச்சது. இதெல்லாம் எதுக்கு நான் சொல்றன்னா, நமக்கு பெரிசா இலக்கிய ஞானமோ இல்ல அறிவியல் ஞானமோ இல்லைங்க. சுஜாதான்றவங்க இந்த பாபா படத்துல ரஜினியோட அம்மாவா வருவாங்களே அவங்களா? அப்படின்ற அளவுக்குதான் நமக்கு இலக்கியம்லாம். எனக்கு தெரிஞ்ச, தெரியப்போகிற விஷயங்கள, அது சினிமாவோ, புத்தகமோ, கிரிக்கெட்டோ, இசையோ அரசியலோ இல்லை எவர்க்ரீன் காதலோ, ஏதோ ஒன்றைப் பற்றி எழுதலாம் என்று எண்ணம். "பெரிய பெரிய யானைங்க வாழுற இந்த காட்டுலதான் சின்ன சின்ன எறும்புகளும் வாழுது" (நன்றி: ஜெயமோகன்). அத மாதிரி நாமளும் ஒரு ஓரமா நிப்போம்னு ஒரு நப்பாசை.

எந்த பெரிய விஷயத்துக்கும் ஆரம்பம்னு ஒன்னு சின்னதா இருக்கும்ல? சரி.. சரி.. நான் எழுதறத பெரிய விஷயம்னு சொல்ல வரல. ஆனா இது ஒரு சின்ன ஆரம்பமா இருக்கட்டும். மற்றபடி வலைப்பூ தொடங்க எனக்கு முன்னோடியாக இருந்த என் தம்பி செந்திலுக்கு நன்றிகள். அவரு ஒரு ப்ளாக் ஆங்கிலத்துல எழுதுறாரு. சார் பெரிய கம்ப்யூட்டர் என்ஜினியர் அதனால அவரு கொஞ்சம் இந்திய அமெரிக்க உறவு, அணு சக்தி ஒப்பந்தம் அப்படின்னு பெரிய பெரிய மேட்டரெல்லாம் எழுதுவாரு. ஆனால் நான் விரைவில் ஒரு மொக்கை மேட்டரோடு உங்களை சந்திக்கிறேன்.